استشاري علاقات أسرية وتربوي . دكتوراه تأهيل نفسي وإرشاد أسري
سعادتك يا بيه !!
ياترى لأول وهلة وأنت بتقرأ العنوان فهمت إيه ؟
سعادتك اللي انت بتدور عليها ومش لاقيها ولا سعادتك لأنك بتدور على نفسك شخصياً ومش لاقيها
ناس كتير بتدور على السعادة في شكل افعال بتعملها وناس تانية بتلاقيها في إمتلاك اشياء وبعدها بشوية صغيرين تلاقيها ترجع تحزن بعدها وتبتدي تدور على حاجة تانية تتبسط بيها تاني ودائرة مش بتخلص . طيب! لغاية امتى تفضل تدور على سعادتك؟ وانت اصلاً مش متصالح مع نفسك .
جاية اقولك سعادتك يا بيه هي الأساس ونفسك هي المفتاح للإحتفاظ بسر سعادتك .
نفسك محتاجة تحترمها زي ما بتحترم الشخص اللي بتحبه وتخاف تجرحه.
نفسك محتاجة تشجعها زي كلامك لحد محبط قدامك .
نفسك محتاجة تفهمها زي ما بتحاول تفهم اللي حواليك .
نفسك محتاجة تسامحها زي ما بتسامح اللي غلط في حقك.
نفسك محتاجة تدلعها وتكافئها زي الطفل الشاطر بتجيب له هدية .
نفسك محتاجة تفضفض بصوت عالي زي ما أنت بتسمع لغيرك .
نفسك محتاجة تحس بقيمتها وغلاوتها عندك علشان ترخيصك ليها بيخسرك سعادتك .
سعادتك يا بيه سعادتك يا هانم في نفسك .
لو دخلت مكان ولاقيت اللي قدامك بيقول اتفضل سعادتك ده مكانك هتحس بيقمتك وتتبسط يمكن بس الموضوع أن سعادتك مش مدي قيمة لسعادتك وده اللي خلاك فاقد سعادتك وبتدور عليها .
السعادة في سعادتك.
خليني اقولهالك سعادتك في نفسك ماتربطش سعادتك في حاجات براك.
خليها هي خارجة من جواك وبكده هتفضل مبسوط .
إعمل المطلوب مع نفسك هتلاقي السعادة نتيجة بتجري وراك.
دلوقتي فهمت سعادتك أنا عايزة اقول إيه !!!
